Thursday 13 April 2017

ಓ ಬಾಬಾಸಾಹೇಬಾ , ವಸ್ದೊಂದು ಲೋಕಾ ನಮ್ಗೆ ಬೇಕೇ ಬೇಕು..



ಖೈರ್ಲಾಂಜಿ

ಆಕಾಸ್ದಿಂದ ರಗತ ಬೆಳದಿಂಗ್ಳು ಸುರಿತು
ನೆಲ್ದ ಮಣ್ಣು ಮಾಂಸದ ಮುದ್ದೆ ಹಂಗಾತು
ಅವತ್ ರಾತ್ರಿ ಆಳೆತ್ರದ ನೀಲಿ ಮೂರ್ತಿ ಕಿರುಚಿ
ಆತ್ಮಗೌರವ ಅಂಬದು ಊ..ಂತ ಗೋಳಿಡ್ತು.

ಕಣ್ಣಲ್ಲಿ ರಕ್ತ ಇಲ್ಲದ್ ಈ ದೇಸ್ದಾಗೆ
ಎಷ್ಟ್ ಸುಲಬ ದಲಿತ್ರ ಕೊಚ್ಚಿ ಕೊಂದ್ ಬಿಸಾಡದು?
ದನಕುರಿ ಕಡಿಯೊ ಕೈಗಾದ್ರು ರವಷ್ಟು
ರುದಯ ಕರುಣೆ ಅಂತ ಇರಬೌದು;
ಮಾಂಸ ಕಡಿಯೊ ಕತ್ತಿಗೂ ಸೈತ
ಹಿಂಜರಿಕೆ, ಭಯ ಆಗಬೌದು.

ಹೂ ಕುಯ್ಯೊ ಕೈಯಿ
ದೇವ್ರುನ ಬೇಡ್ಕಳೊ ಕೈಯಿ
ಬೇರ‍್ಯೋರ್ಗೆ ಸಾಯ ಮಾಡೊ ಕೈಗುಳೆಲ್ಲ ಇದ್ವಲ
ಏನ್ ಕಡಿತಿದ್ವು ಅವೆಲ್ಲ ಆವಾಗ ಅಲ್ಲಿ?

ಯವ್ವೋ, ಯಕ್ಕೋ
ಬೇರೆ ಎಂಗಸ್ರ ಕೊಂದು ಕೊಚ್ಚಿ
ಸಾಯೂ ತಂಕ ಜಪ್ಪೊ ಹಂಗೆ
ಕ್ರೂರಪ್ರಾಣಿಗಳಂತ ನಿಮ್ ಗಣಸ್ರ
ಅದೆಂಗ್ ಎತ್ತಿ ಕಟ್ಟಿ ಸುಮ್ಕಿದ್ರವ್ವ?

ಎದೆ ಮೇಲ್ನ ಸೆರಗು ರವಷ್ಟು ಕೆಳಗ್ ಸರುದ್ರೆ ಸಾಕು
ಶೀಲನೆ ಹಾಳಾಯ್ತು ಅಂತ ಗಾಬ್ರಿಯಾಯ್ತಿರಿ
ಅಂತೋರು, ಅದೆಂಗೆ ನಿಮ್ಮಂತೋಳೆ ಒಬ್ಳ
ಮೊಲೆ ಕತ್ತರ‍್ಸಿ ಕಿತ್ ಬಿಸಾಡಿ
ತಾಯಿ ಮಗಳ್ನ ಎದ್ರಾಎದ್ರೆ ರೇಪ್ ಮಾಡ್ರಿ ಅಂತ
ನಿಮ್ ಗಣಸ್ರಿಗೆ ಚುಚ್ಚಿ ಕೊಟ್ರೆವ?
ಇಂಥಾ ಭಯಂಕರವಾದ್ದು ನಿಮ್ ಕಣ್ಣೆದ್ರೆ ನಡಿತಿದ್ರು
ಅದೆಂಗ್ ಅದಕ್ ಸಾಕ್ಷಿಯಾಗಿ ಸುಮ್ಮನಿದ್ರೆ ಯವ್ವ?

ಯಮೋ, ಭಾರತ್ ಮಾತೆ
ನಾವು ಸಂಕ್ಟ ಬಟ್ಟು ಅಳ್ತಿದಿವಿ ಕಮ್ಮೊ
ಯೋ ಗಾಂಧಿ
ನಾವ್ ಕಷ್ಟದಾಗಿದಿವಿ ಕಯ್ಯೊ
ಓ ಬಾಬಾಸಾಹೇಬಾ
ಸಿಟ್ನಿಂದ ನಾವ್ ಕುದಿತಿದಿವಿ ಕನಪ್ಪೊ.

ತಲೆಯೆತ್ತಿ ಬದ್ಕಕ್ಕೆ ನಮ್ಗೆ ವಸ್ದೊಂದು ಲೋಕಾನೆ ಬೇಕು
ಕೊನೆಪಕ್ಸ ನಂ ಯೋನಿ ಮೊಲೆನಾದ್ರು ಸುರಕ್ಷಿತವಾಗಿರೋವಂತ
ವಸ್ದೊಂದು ಲೋಕಾ ನಮ್ಗೆ ಬೇಕೇ ಬೇಕು..

ತೆಲುಗು ಮೂಲ: ಯೆಂಡ್ಲೂರಿ ಸುಧಾಕರ
ಇಂಗ್ಲಿಷ್ ಗೆ: ಕೆ. ಪುರುಷೋತ್ತಮ್
ಕನ್ನಡಕ್ಕೆ: ಎಚ್. ಎಸ್. ಅನುಪಮಾ

7 comments:

  1. ಮೇಡಂ ಮತ್ತೆ ಮತ್ತೆ ಓದುತ್ತಿರುವೆ. ಥ್ಯಾಂಕ್ಸ್

    ReplyDelete
  2. kone pyara vodi manassu vaddaduthide..
    ee vasa loka barle beku...barle beku annokintha tharle beku...

    ReplyDelete
  3. kone pyara vodi manassu vaddaduthide..
    ee vasa loka barle beku...barle beku annokintha tharle beku..

    ReplyDelete