ಕವಿತೆ - ಬೇಲಿ ಮೇಲಿನ ಬಳ್ಳಿ

ಗೆಳತಿ,

ಪ್ರಶ್ನೆ ತುಂಡರಿವೆಯದಲ್ಲ, 

ಹೊಟ್ಟೆಯಲೂ ಹೆಣ್ಣನೊಲ್ಲದು 

ಗಂಡು ಗರುವದ ಲೋಕ

ಹೆಣ್ಣವಳು ಅಹುದಹುದು ಎನಬೇಕು 

ತಲೆತಗ್ಗಿಸಿ ನೆಲ ನೋಡಿ ನಡೆಯಬೇಕು 

ಒತ್ತಿದರೆ ಕುಗ್ಗಿ, ಸಂದಿಯಲಷ್ಟು ನುಸುಳಿ

ಇಟ್ಟಲ್ಲಿ ಇಟ್ಟಂತೆ ಸುಮ್ಮಗಿರಬೇಕು 

ಒಲ್ಲೆ, ಬಲ್ಲೆ ಎನುವುದೇ ಅಪರಾಧ

ಏಕೆಂದಿರೋ, ಮುಗಿಯಿತು ಮಾನಸನ್ಮಾನ

ಲೋಕ ಕಾದಿದೆ ಎಳೆಯಲು ಸರಹದ್ದು

ಏನಚ್ಚರಿ, ತುಂಡರಿವೆಯ ನೆಪ ಹಿಡಿದು 

ರಪ್ಪೆಂದು ದರವಾಜ ಮುಚ್ಚಿಕೊಳುವುದು?

ಎಲ್ಲೆಂದರಲಿ ಎದ್ದು ನಿಂತಿವೆ ಬೇಲಿ

ಮತವೆಂಬ ಬೇಲಿ ಪಂಥವೆಂಬ ಬೇಲಿ

ಕುಟುಂಬಮರ್ಯಾದೆಯೆಂಬ ಎತ್ತರದ ಬೇಲಿ

ಹೆಣ್ಣ ಪಳಗಿಸಲು ಏಸೊಂದು ಚಾಟಿ!?

ಬೇಲಿಯೊಳ ಹಿಸುಕಲು ನೂರು ದಾರಿ

ಗೆಳತಿ,

ಬಳ್ಳಿ ಹಬ್ಬದಿರದು ಬೇಲಿ ಕಟ್ಟಿದರೆಂದು

ಬಣ್ಣಬಾವುಟಗಳು ನಮಗಲ್ಲ, ಬಿಸುಡು 

ಇಂದವರು ತಂದು ಹೊದಿಸಿದ ಕುರುಹು

ಪ್ರೀತಿಯದಲ್ಲ, ಕೈಕೋಳ ಉರುಳು, ಹುಶಾರು!

ಶಾಲು, ಮುಸುಕು, ಪರದೆ ಸರಿಸಿ

ಬೆಳಕ ನೋಡಬನ್ನಿ ಗೆಳತಿಯರೇ,

ಕುರುಹಿನ ಅರಿವೆಗಳ ಒಲ್ಲೆ ಎನ್ನಿ 

ಶಾಲು ಪರದೆ ಪಟ್ಟಿಗಳ ಕಿತ್ತೆಸೆದು ಬನ್ನಿ 

ರಬಿಯಾ ಲಲ್ಲಾ ಅಕ್ಕ ಬೆಳಕೆನ್ನುವ ಬನ್ನಿ 

ಬನ್ನಿರೇ ದಾಟೋಣ ಬಣ್ಣಗಳ ಬೇಲಿ

ಬನ್ನಿರೇ ಮೀರೋಣ ಮತಪಂಥದ ಗಡಿ

ಬನ್ನಿರೇ ಕೈ ಹಿಡಿದು ನಿಲುವ ಸರಹದ್ದಿನಲಿ

ಕಾದಿವೆ ಬಯಲಲಿ ಸಾವಿರದ ಕೈಯಿ

ಹಂಬಲದ ತೋಳಗಲಿಸಿ ಅದೋ ಅಲ್ಲಿ

ಬನ್ನಿರೇ, ಮೈತ್ರಿಹೂ ಅರಳಲಿ ನಮ್ಮೊಳಗೆ

ಬಟ್ಟೆಯೊಡಲೊಳಗೇ ನೇಯ್ದ ಚಿತ್ರದಂತೆ

ಅಳಿದರೂ ಉಳಿದರೂ ಒಡನೆಯೇ ಎನುವಂತೆ

ಎಚ್. ಎಸ್. ಅನುಪಮಾ

ಕಲೆ: ಡಾ. ಕೃಷ್ಣ ಗಿಳಿಯಾರ್